Dins son edicion del mes de març de 2022 lo magazine de la metropòli de Montpelhièr tornava sul grop, Lo Cocut, que presentava lo tretze de març de 2022 a La Passarèla de Jacon son recital annal de cants e de musicas.

Los ravits del Cocut

Se dison amb un nom d’aucèl... Lo Cocut, es un vintenat d’òmes que se recampan notadament per cantar, sens particion ni pupitre. Son cant es liure, son umor florit ! 40 % de nòtas falsas son toleradas per aquela corala occitana que n’es pas una per de bon. Cantaràn lo dimenge 13 de març a cinc oras del vèspre, « tot bèl just abans la sopa ! », sala La Passarèla. Un tròba-te de mancar pas, desempuèi dètz annadas a Jacon.

« Es un pauc la fèsta de fin d’annada escolara al biais nòstre, lo nòstre ponch d’òrgue, l’escasença de convidar femnas e formacions de pertot », çò ditz Estève Hammel, corista e president de Lo Cocut, còla que se produsís mai que mai per las temporas de Nadal, castanhadas, vespertins, vendémias emai concors de caçolet. Aquel espectacle es al biais d’una brava taulejada ! Emai, Lo Cocut nasquèt en 1992, a l’escasença de las nòças de la filha d’un dels sòcis fondators. « S’avisèrem qu’aviam pas de repertòri occitan a posita per aquela mena de circonstàncias ». Alavètz, crida als amators de cultura occitana, mas pas sonque.

Coma platat principal, un recital de cants e de musicas, amb Loís Avit Colombièr, pianista classic, voses a capella. Al menut, La filha d’un païsan, una romança que lo rei remarca la filha d’un païsan que se voliá pas mostrar... A la conolha, un cant de trabalh d’una femna, La Dòna de Bordèu, que se la pèta qu’es polida. Son òme la remanda ! Lo rei de Babilòn, amb de paraulas de Max Roqueta o Los podaires (los de la vinha que se tòrran a de bon l’ivèrn !)

Pas de menut sens intradas ni dessèrts. I aurà mai de documentaris, dont la vidèo inedita : Diga-me, Jacon, per las piadas de l’occitan a Jacon, una mòstra, un aperitiu-galejada e de tastas d’especialitats occitanas, solide. Un repertòri festiu e convivial de se rosigar a de bon.


Sèrgi Viaule : critica del libre de Pau Gayraud 'Lo libre del causse'

Lo libre del causse - Pau Gayraud - Vent Terral

En 2016 l'editor Vent Terral tornava editar Lo libre del causse de Pau Gayraud.

Extrach del 'Lo fiu de l'uòu' de Robèrt Lafont

Dins lo conte Lo fiu de l'uòu publicat en 2001 per Atlantica, Robèrt Lafont s'arrèsta dins sa narracion a Besièrs en 1209 del temps de la crosada e del grand masèl. Extrach.

Lei santons de Provença

Sus los santons de provença, un article de la revista del conselh general de las Bocas de Ròse, Accent de Provence, numèro 263, novembre e decembre de 2016.