Visuala del plan Cultura Viva © Region Occitània
Del 13 de mai de 2022 al 13 de junh l'executiu de la Region Occitània organiza una consultacion sus las lengas occitana e catalana. L'enquèsta es menada dins l'encastre del plan Cultura Viva qu'a per vocacion de desvolopar l'usatge d'aquelas doas lengas sul territòri de la region.
Comunicat de Benjamin Assié, conselhièr regional, delegat a las politicas lingüisticas occitana e catalana
Dins lo quadre de sas concertacions ciutadanas en linha (La Région citoyenne), avèm obtengut que la question de las lengas occitana e catalana siá mesa en valor amb l’argument qu’utilizan totes : la populacion es largament favorabla a l’accion en favor de las lengas e culturas occitanas e catalanas.
Evidentament, avèm un enjòc partejat mai que gròs qu’aquesta consultacion simpla (5 minutas per i respondre, pas besonh de s’inscriure), faita pel public grand, mòstre que l’espèr de la populacion de la region es grand en la matèria.
Vos convidi doncas de far conéisser largament aquesta pichòta consultacion en linha, de far participar totes vòstres amics que son tanben amics de las lengas e culturas de la nòstra region !
I a tanben un questionnari « 15-18 ans » que se pòt prepausar als enfants, nombroses qu’aprenon la lenga a l’escòla. Es l’escasença de lor balhar la paraula, los implicar mai dins çò que se pòt far en defòra de l’escòla, etc. Per de rason de reglament èra pas possible d’o far oficialament per de pichons en dejós de 15 ans mas se lo vòstre pichon vòl respondre e qu’a pas encara l’atge, evidentament que se pòt far.
Mercés fòrça d’avança de vòstra ajuda essenciala a çò que volèm èsser una capitada per mostrar al mond que sèm pas los darrièrs dels Mohicans !
Benjamin Assié
